ยาว ตํ มูลํ ตสฺส หตฺถคตํ โหติ ตาว น อญฺโญ โกจิ ปกติมนุสฺโส ตํ ปุริสํ ปสฺสติ
เนโส มหาราช คุโณ ปุริสสฺส มูลสฺเสโส คุโณ อนฺตรธานสฺส ยํ โส ปกติมนุสฺสานํ
จกฺขุปเถ น ทสฺสติ เอวเมว โข มหาราช น เอเต คุณา ปุคฺคลสฺส เมตฺตาภาวนาย
เอเต คุณา ฯ ยสฺมึ มหาราช ขเณ ปุคฺคโล เมตฺตํ สมาปนฺโน โหติ น ตสฺส ปุคฺคลสฺส
ตสฺมึ ขเณ อคฺคิ วา วิสํ วา สตฺถํ วา กมติ ฯ ตสฺส เย เกจิ อหิตํ เอสิโน
อุปคนฺตฺวา น สกฺโกนฺติ อหิตํ กาตุนฺติ ฯ อจฺฉริยํ ภนฺเต นาคเสน อภูตํ ภนฺเต
นาคเสน สพฺพาปาปนิวารณา เมตฺตาภาวนาติ ฯ สพฺพกุสลคุณาวหา มหาราช เมตฺตาภาวนา
หิตานมฺปิ อหิตานมฺปิ ฯ เย เต สตฺตา วิญฺญาณพทฺธา สพฺเพสํ มหานิสํสา เมตฺตาภาวนา
สํวิภชิตพฺพาติ ฯ

เมตฺคานิสํสปญฺโห จตุตฺโถ ฯ

ภนฺเต นาคเสน กุสลการิสฺสาปิ อกุสลการิสฺสาปิ ทฺวินฺนํ วิปาโก สมสโม
อุทาหุ โกจิ วิเสโส อตฺถีติ ฯ มหาราช กุสลสฺส จ อกุสลสฺส จ วิเสโส ฯ กุสลํ
มหาราช สุขวิปากํ สคฺคสํวตฺตนิกํ อกุสลํ ทุกฺขวิปากํ นิรยสํวตฺตนิกนฺติ ฯ ภนฺเต นาคเสน
ตุมฺเห ภณถ เทวทตฺโต เอกนฺตกณฺโห เอกนฺตกาฬเกหิ ธมฺเมหิ สมนฺนาคโต โพธิสตฺโต
เอกนฺตสุกฺโก เอกนฺตสุกฺเกหิ ธมฺเมหิ สมนฺนาคโตติ ฯ ปุน จ เทวทตฺโต ภเว ภเว
ยเสน จ ปกฺเขน จ โพธิสตฺเตน สทิโส โหติ สมสโม กทาจิ อธิโก วา ฯ ยทา
เทวทตฺโต นคเร พาราณสิยํ พฺรหฺมทตฺตสฺส รญฺโญ ปุโรหิตปุตฺโต อโหสิ ตทา โพธิสตฺโต
ยสสา จ นิหีโน ชาโต ฉวกจณฺฑาลกุเล อโหสิ วิชฺชาธโร วิชฺชํ ปริวตฺเตตฺวา อกาเล
อรญฺเญ อมฺพผลานิ นิพฺพตฺเตสิ ฯ เอตฺถ ตาว โพธิสตฺโต เทวทตฺตโต ชาติยา
นิหีโน ฯ ปุน จ ปรํ ยทา เทวทตฺโต ราชา อโหสิ อหิปติ สพฺพกามสมงฺคี ตทา
โพธิสตฺโต ตสฺเสว อุปโภโค อโหสิ หตฺถินาโค สพฺพลกฺขณสมฺปนฺโน ตสฺส อาจารคติวิลาสํ
อสหมาโน ราชา วธมิจฺฉนฺโต ตหฺถาจริยํ เอวํ อวจ อสิกฺขิโต เต อาจริย หตฺถินาโค
ตสฺส อากาสคมนํ นาม กาเรหีติ ตตฺถปิ ตาว โพธิสตฺโต เทวทตฺตโต ชาติยา นิหีโน
ติรจฺฉานคฺโต ลามโก ฯ ปุน จ ปรํ ยถา เทวทตฺตโต มนุสฺโส อโหสิ ปวเน ติฏฺฐติ
โส ตทา โพธิสตฺโต มหากปิ นาม มกฺกโฏ อโหสิ พลวา ปญฺจนาคพลธโร ฯ ยทา
โพธิสตฺโต ฉทฺทนฺโต นาม หตฺถินาโค อโหสิ ตทา โส ลุทฺธโก ตํ หตฺถินาคํ ฆาเตสิ
ตตฺถปิ ตาว เทวทตฺโต อธิกตโร ฯ ปุน จ ปรํ ยทา เทวทตฺโต มนุสฺโส อโหสิ

วนจรโก อนิเกตวาสี ตทา โพธิสตฺโต สกุโณ อโหสิ ติตฺติโร นาม มนฺตสชฺฌายิโก
ตทาปิ โส ปวนํ จรนฺโต ตํ สกุณํ ฆาเตสิ ตตฺถปิ ตาว เทวทตฺโต ชาติยาเยว
อธิกตโร ฯ ปุน จ ปรํ ยทา เทวทตฺโต ทุมฺมตินคเร กุลาปุ นาม กาสิราชา อโหสิ
ตทา โพธิสตฺโต ตาปโส อโหสิ ขนฺติวาที ตทา โส ราชา ตสฺส ตาปสสฺส กุทฺโธ
หตฺถปาเท วํสกฬีเร วิย ฉินฺทาเปสิ ตตฺถปิ เทวทตฺโต อธิกตโร ชาติยา จ ยเสน
จ ฯ ปุน จ ปรํ ยทา เทวทตฺโต อเจลโก อโหสิ โกรมฺภิโก นาม ตทา โพธิสตฺโต
ปนฺทรโก นาม นาคราชา อโหสิ ตตฺถปิ ตาว เทวทตฺโตเยว โยนิยา อธิกตโร ฯ ปุน
จ ปรํ ยทา เทวทตฺโต มนุสฺโส อโหสิ ปวเน ชฏิลโก ตทา โพธิสตฺโต ตจฺฉโก นาม
มหาสูกโร อโหสิ ตตฺถปิ ตาว เทวทตฺโตเยว โยนิยา อธิกตโร ฯ ปุน จ ปรํ ยทา
เทวทตฺโต เจตีสุ อุปริจโร นาม ราชา อโหสิ อุปริปุริสมตฺเต คคเน เวหาสงฺคโม ตทา
โพธิสตฺโต กปิโล นาม พฺราหฺมโณ อโหสิ ตตฺถปิ ตาว เทวทตฺโตเยว ชาติยา อธิกตโร
ยเสน จ ฯ ปุน จ ปรํ ยทา เทวทตฺโต มนุสฺโส อโหสิ สาโม นาม ตทา โพธิสตฺโต
รุรุ นาม มิคราชา อโหสิ ตตฺถปิ ตาว เทวทตฺโตเยว โยนิยา อธิกตโร ฯ ปุน จ
ปรํ ยทา เทวทตฺโต มนุสฺโส อโหสิ สุสาโม นาม ลุทฺธโก ปวนจรโก ตทา โพธิสตฺโต
หตฺถินาโค อโหสิ โส ลุทฺธโก ตสฺส หตฺถินาคสฺส สตฺตกฺขตฺตุํ ทนฺเต ฉินฺทิตฺวา หริ
ตตฺถปิ ตาว เทวทตฺโตเยว โยนิยา อธิกตโร ฯ ปุน จ ปรํ ยทา เทวทตฺโต สิงฺคาโล
อโหสิ ขตฺติยธมฺโม โส ยาวตา ชมฺพูทีเป ปเทสราชาโน เต สพฺเพ อนุยุตฺเต อกาสิ
ตทา โพธิสตฺโต วิธุโร นาม ปณฺฑิโต อโหสิ ตตฺถปิ ตาว เทวทตฺโต ยเสน
อธิกตโค ฯ ปุน จ ปรํ ยทา เทวทตฺโต หตฺถินาโค หุตฺวา ลฏุกิกาย สกุณิยา ปุตฺเต
ฆาเตสิ ตทา โพธิสตฺโตปิ หตฺถินาโค อโหสิ ยูถปติ ตตฺถปิ ตาว เต อุโภ สมสมา
อเหสุํ ฯ ปุน จ ปรํ ยทา เทวทตฺโต ยกฺโข อโหสิ อธมฺโม นาม ตทา โพธิสตฺโต
ยกฺโข อโหสิ สุธมฺโม นาม ตฺถปิ ตาว เต อุโภ สมสมา อเหสุํ ฯ ปุน จ ปรํ
ยทา เทวทตฺโต นาวิโก อโหสิ ปญฺจนฺนํ กุลสตานํ อิสฺสโร ตทา โพธิสตฺโตปิ นาวิโก
อโหสิ ปญฺจนฺนํ กุลสตานํ อิสฺสโร ตตฺถปิ ตาว เต อุโภปิ สมสมา อเหสุํ ฯ ปุน
จ ปรํ ยทา เทวทตฺโต สาโข นาม มิคราชา อโหสิ ตทา โพธิสตฺโตปิ นิโคฺรโธ นาม
มิคราชา อโหสิ ตตฺถปิ ตาว เต อุโภ สมสมา อเหสุํ ฯ ปุน จ ปรํ ยทา เทวทตฺโต
กณฺฑหาโล นาม ปุโรหิโต อโหสิ ตทา โพธิสตฺโต จนฺโท นาม ราชกุมาโร อโหสิ
ตตฺถปิ ตาว อเนน กณฺฑหาโล อธิกตโร ฯ ปุน จ ปรํ ยทา เทวทตฺโต สตฺถวาโท

อโหสิ ปญฺจนฺนํ สกฏสตานํ อิสสโร ตทา โพธิสตฺโตปิ สตฺถวาโห อโหสิ ปญฺจนฺนํ
สกฏสตานํ อิสฺสโร ตตฺถปิ ตาว เต อุโภ สมสมา อเหสุํ ฯ ปุน จ ปรํ ยทา
เทวทตฺโต อลาโต นาม มหาเสนาปติ อโหสิ โส สพฺพํ มหารชฺชํ เอกมุขํ อกาสิ ตทา
โพธิสตฺโต นารโท นาม พฺรหฺมา อโหสิ ตตฺถปิ ตาว เต อุโภ สมสมา อเหสุํ ฯ
ปุน จ ปรํ ยทา เทวทตฺโต พฺรหฺมทตฺโต นาม กาสิกราชา อโหสิ ตทา โพธิสตฺโต
มหาปทุมกุมาโร นาม ตสฺส ปุตฺโต อโหสิ ตทา โส ราชา สกํ ปุตฺตํ โจรปฺปปาเต
ขิปาเปสิ ฯ ยโต กุโตจิ ปิตาว ปุตฺตานํ อธิโก อโหสิ วิสิฏฺโฐ ฯ ตตฺถปิ ตาว เทวทตฺโต
อุตฺตโร อธิโก จ ฯ ปุน จ ปรํ ยทา เทวทตฺโต มหาปตาโป นาม ราชา อโหสิ
ตทา โพธิสตฺโต ตสฺส ปุตฺโต ธมฺมปาโล นาม กุมาโร อโหสิ ตทา โส ราชา สกสฺส
ปุตฺตสฺส หตฺถปาเท สีสํ จ เฉทาเปสิ ตตฺถปิ ตาว เทวทตฺโต อุตฺตโร อธิกตโร
ทิสฺสติ ฯ อชฺเชตรหิ อุโภปิ เต สกฺยกุเล ชายึสุ ฯ โพธิสตฺโต พุทฺโธ อหุ สพฺพญฺญู
เทวทตฺโต อสฺส อติเทวสฺส สาสเน ปพฺพชฺชิ โส อิทฺธึ นิพฺพตฺเตตฺวา พุทฺธาลยํ
ทสฺเสสิ ฯ กินฺนุ โข ภนฺเต นาคเสน ยํ มยา ภณิตํ ตํ สพฺพํปิ ตถํ อุทาหุ
วิตถนฺติ ฯ ยํ ตฺวํ มหาราช พหุวิธํ การณํ โอสาเรสิ สพฺพนฺตํ ตเถว โน
วิตถนฺติ ฯ ยทิ ภนฺเต นาคเสน กณฺโห จ สุกฺโก จ อุโภ สมสมคติกา โหนฺติ เตนหิ
กุสลํปิ อกุสลํปิ สมสมวิปากํ โหตีติ ฯ น หิ มหาราช กุสลํปิ อกุสลํปิ สมสมวิปากํ
โหติ น หิ มหาราช เทวทตฺโต สพฺเพหิ ชเนหิ ปฏิวิรุทฺโธ โพธิสตฺโต เนว ปฏิวิรุทฺโธ
โย ตสฺส โพธิสตฺเต ปฏิวิโรโธ โส ตสฺมึเยว ภเว วิปจฺจติ ผลํ เทติ ฯ เทวทตฺโต
มหาราช อิสฺสริเย ฐิโต ชนปเทสุ อารกฺขํ เทติ เสตุสภาปุญฺญาลยํ การาเปติ
สมณพฺราหฺมณกปณวณิพฺพกานํ ยถาปณิหิตํ ทานํ เทติ โส ตสฺส วิปาเกน ภเว สมฺปตฺตี
ลภติ ตสฺเสตํ มหาราช น สกฺกา วตฺถุํ วินา ทาเนน ทมเนน สญฺญเมน อุโปสถกมฺเมน
สมฺปตฺตึ อนุภวตีติ ฯ ยํ ปน ตุวํ มหาราช เอวํ วเทยฺยาสิ เทวทตฺโต จ โพธิสตฺโต
จ เอกโต อนุปริวตฺตนฺตีติ โส น ชาติสตสฺส อจฺจเยน สมาคโม อโหสิ น ชาติสหสฺสสฺส
อจฺจเยน น ชาติสตสหสฺสสฺส อจฺจเยน กทาจิ กรหจิ พหุนฺนํ อโหรตฺตานํ อจฺจเยน
สมาคโม อโหสิ ฯ ยํ ปเนตํ มหาราช ภควตา กาณกจฺฉปูปมํ อุปทสฺสิตํ
มนุสฺสตฺตปฏิลาภาย ตถูปมํ มหาราช อิเมสํ สมาคมํ ธาเรหิ ฯ น มหาราช โพธิสตฺตสฺส
เทวทตฺเตเนว สทฺธึ สมาคโม อโหสิ ฯ เถโรปิ มหาราช สารีปุตฺโต อเนกชาติสตสหสฺสานิ
โพธิสตฺตสฺส ปิตา อโหสิ มหาปิตา อโหสิ จุลฺลปิตา อโหสิ ภาตา อโหสิ ปุตฺโต อโหสิ

ภาคิเนยฺโย อโหสิ มิตฺโต อโหสิ ฯ โพธิสตฺโต มหาราช อเนกชาติสตสฺหสฺสานิ เถรสฺส
สารีปุตฺตสฺส ปิตา อโหสิ ฯ เป ฯ มิตฺโต อโหสิ ฯ สพฺเพปิ เต มหาราช สตฺตา
สตฺตนิกายปริยาปนฺนา สํสารโสตมนุคตา สํสารโสเตน วุยฺปนฺตา อปฺปิเยหิปิ ปิเยหิปิ
สมาคจฺฉนฺติ ฯ ยถา มหาราช อุทกํ โสเตน วุยฺหมานํ สุจิอสุจิกลฺยาณปาปเกหิ สทฺธึ
สมาคจฺฉติ เอวเมว โข มหาราช สพฺเพปิ สตฺตา สตฺตนิกายปริยาปนฺนา สํสารโสตํ อตุคตา
สฺสารโสเตน วุยฺหนฺตา อปฺปเยหิปิ ปิเยหิปิ สมาคจฺฉนฺติ ฯ เทวทตฺโต มหาราช ยกฺโข
สมาโน อตฺตนา อธมฺมิโก สมาโน ปเร อธมฺเม นิโยเชตฺวา สตฺตปญฺญาสวสฺสโกฏิโย
สฏฺฐิญฺจ วสฺสสตสหสฺสานิ มหานิรเย ปจฺจิ ฯ โพธิสตฺโตปิ มหาราช ยกฺโข สมาโน
อตฺตนา ธมฺมิโก สมาโน ปเร ธมฺเม นิโยเชตฺวา สตฺตปญฺญาสวสฺสโกฏิโย สฏฺฐิญฺจ
วสฺสสตสหสฺสานิ สคฺเค ปโมทิ สพฺพกามยสสมงฺคี ฯ อปิจ มหาราช เทวทตฺโต อิมสฺมึ
ภเว พุทฺธํ อนุสาสนิยํ อปฺปสาเทสิ สกิเลสภาคิเกน โส สมคฺคญฺจ สํฆํ ภินฺทิตฺวา ปฐวึ
ปาวิสิ ตถาคโต พุชฺฌิตฺวา สพฺพธมฺเม นิพฺพุโต อุปธิสํขเยติ ฯ สาธุ ภนฺเต นาคเสน
เอวเมตํ ตถา ธาเรยฺยามีติ ฯ

กุสลากุสฺลสมสมปญฺโห ปญฺจโม ฯ

ภนฺเต นาคเสน ภาสิตมฺปิ เหตํ ภควตา
สเจ ลเภถ ขณํ วา รโห วา
นิมนฺตกํ วาปิ ลเภถ ตาทิสํ
สพฺพาปิ อิตฺถิโย กเรยฺยุ ปาปํ
อญฺญํ อลทฺธา ปีฐสปฺปินา สทฺธินฺติ ฯ
ปุน จ เอวํ กถิยติ มโหสถสฺส ภริยา อมรา นาม อิตฺถี คามเก ฐปิตา ปวุตฺถปติกา
รโห นิสินฺนา วิวิตฺตา ราชปฏิสมํ สามิกํ กริตฺวา สหสฺเสน นิมนฺติยมานา ปาปกมฺมํ
นากาสีติ ฯ ยท ภนฺเต นาคเสน ภควตา ภณิตํ
สเจ ลเภถ ขณํ วา รโห วา
นิมนฺตกํ วาป ลเภถ ตาทิสํ
สพฺพาปิ อิตฺถิโย กเรยฺยุ ปาปํ
อญฺญํ อลทฺธา ปีฐสปฺปินา สทฺธินฺติ